Wynand Strydom is ‘n Suid-Afrikaanse sanger en liedjieskrywer wat al jare lank ‘n standvastige plek in die harte van Suid-Afrikaners het. Met sy unieke styl en emosionele musiek het hy vir homself ‘n plek in die Afrikaanse musiekbedryf verwerf. Sy nuutste enkelsnit, “Terug Na Jou,” is ‘n liedjie wat beslis ‘n blywende indruk sal maak op luisteraars.
Die liedjie is die perfekte vertolking van die gevoel van verlange om terug te keer na die plek waar ons tuis voel. Dit is ‘n tema wat vandag meer relevant is as ooit tevore, aangesien ons in ‘n tyd leef waarin mense oral ter wêreld ‘n behoefte het om hulself te verbind met hul kultuur en tuisland.
Met die opening van die liedjie, “Dis kwart voor twaalf en die pad lê nog ver,” skep Wynand ‘n beeld van ‘n lang en moeilike pad wat wag. Die pad is ‘n metafoor vir die lewe se uitdagings, en die donker maan wat op die horison tango, versterk hierdie gevoel van onsekerheid en ongemak.
Wynand se stem en musiek neem jou mee op ‘n emosionele reis terwyl hy sing van die verlange om terug te keer na die plek waar sy hart behoort. Sy unieke styl en stem skep ‘n emosionele verbinding met die gehoor en maak die liedjie onvergeetlik.
Die koor, “Terug na jou is die pad wat ek nou vat, terug na jou is waar my hart die diepste pad stap,” verwoord die diepste gevoelens van die verlange om terug te keer na ‘n geliefde. Die liedjie is nie net ‘n uiting van verlang nie, maar ook ‘n viering van die liefde en verbondenheid wat ons het met die plek waar ons tuis voel. Wynand se musiek is ‘n herinnering aan die dinge wat ons belangrik vind in die lewe en aan die dinge wat ons verbind.
Luisteraars kan verwag dat Wynand in die toekoms meer musiek sal produseer wat emosioneel en hartroerend is. Hy is ‘n kunstenaar wat sy musiek gebruik om ‘n boodskap oor te dra en emosie te wek. Met “Terug Na Jou” het hy weereens bewys dat hy ‘n kunstenaar is wat dit regkry.
“Terug Na Jou” sal op 28 April op alle digitale platforms beskikbaar wees en dit is beslis ‘n liedjie wat jy nie wil misloop nie. Sterkte met die verlange…
Die eerste radio-enkelsnit van die bekende internasionale akteur, sanger en liedjieskrywer, Neil Sandilands is onlangs bekendgestel en die werk wat aangebied word is van die hoogste gehalte. Dit dwing jou tot stilte, laat jou dink en máák jou luister.
Sandilands se lied, Huistoe, handel oor ‘n poskaart wat sy Oupa, Joe Sandilands vir sy Ouma Nettie tydens die Tweede Wêreldoorlog gestuur het. Hy vertel in sy eie woorde:
“Ek is versigtig opgewonde oor die bekendstelling van hierdie liedjie.
Verlede jaar, September 2022, was ek in Sydney, Australië toe die liedjie kom aanklop het. Ek het ’n poskaart onthou wat in ons huis was, wat Oupa Joe Sandilands vir Ouma Nettie gestuur het ten tye van die Tweede Wêreldoorlog. Natuurlik was ons eietydse belewenis onthuts deur die moontlikheid van ’n Derde Wêreldoorlog. Ek verwys na die onstabiliteit wat die wêreld beleef het (en steeds beleef) met die situasie tussen die groot moonthede Rusland, die VSA en China rondom die Oekraïne vraagstuk.
Oupa was ’n tenkbestuurder vir die Suid-Afrikaanse troepe tydens die slag van Tobruk, Libië, 1942. Dié poskaart, nou vergeel deur tyd, was ’n foto van die piramides in Egipte en regs bo is daar ’n inleg van Oupa Joe met sy militêre baret en links bo, sekerlik die enigste foto wat Oupa van sy beminde, Ouma Nettie, gehad het. Moontlik het die bestuur van die operasie dit goedgedink om vir al die troepe so ’n poskaart te maak om aan hul geliefdes te stuur, want ek ken nog ’n persoon met ’n soortgelyke poskaart.
Oupa Joe het nie die geleenthede gehad wat ek kon geniet met betrekking tot skool en geletterdheid nie, maar hy kon sy naam skryf: Josef Willem Sandilands. Ek dra sy name. Ek het gewonder wat hy graag sou wou skryf vir Ouma Nettie. ’n Gedig? ’n Liefdesverklaring? ’n Liedjie? Ek het gedink oor die hunkering na ongedeerde tuiskoms en vereniging met die mense wie jy lief het, die omgewing wat jy lief het, die taal en kultuur wat jy ken en lief het. Ek kon op ’n manier identifiseer.
Die tweede element wat ook van waarde is, met die skepping van hierdie liedjie, was ’n persoonlike belewenis ver van Suid-Afrika op die eiland van Kauai, in die Stille Oseaan. Ek was daar rondom 1997. Dit is letterlik die anderkant van die planeet. Die pad hou op by Ke’e strand. Dis nie menslik moontlik om verder te ry of verder weg van jou oorsprong, Randfontein, Suid-Afrika, te wees nie. Toe ek weer in die kar klim en daar wegry, het die gedagte by my posgevat, dat dit nie saakmaak of ek noord, oos, wes of suid bestuur nie, op ’n manier reis ek “huistoe”. Terug na oorsprong.
Met ons onlangse toer “Woorde en Akkoorde na die Noorde” het hierdie liedjie dit self begin uitsonder as een van die gunsteling liedjies vir die gehoor. Ek dink dis omdat daar universalisme aan die gedagte van tuiskoms, hunkering, verlange, en in mees eenvoudige terme, “huis” is.
Die openingslyn is: “By Giza, in Egipte, kyk Josef in die lens…”
Ek deel graag, Huistoe.”
Huistoe is nou op alle digitale platforms beskikbaar, tesame met die eerste enkelsnit, Verkenner, wat reeds ‘n week gelede beskikbaar gemaak is. Beide hierdie snitte kan saam met ‘n skakel afgelaai word waar jy die volle album wat op 1 Mei beskikbaar sal wees kan gaan merk. Kyk gerus uit want daar sal elke week nog ‘n enkelsnit bekendgestel word vanaf hierdie merkwaardige opkomende album.
Die talentvolle kunstenaar Tino, afkomstig uit Zimbabwe en tans woonagtig in Stellenbosch, is gereed om sy nuwe liedjie “Tassies Pak” op 7 April op alle digitale musiekplatforms bekend te stel. Hierdie nuwe bekendstelling is die opvolg na sy baie suksesvolle debuut album “Sterrekind,” en enkelsnit “Afstand” wat nommer een op die RSG treffersparade behaal het.
“Tassies Pak” is ‘n kragtige liefdes lied wat die diepte van menslike emosies en die onbekende faktore van die liefdeswêreld verken. Dit is ‘n unieke rock-pop komposisie met Tino se kenmerkende warm stem wat dit ‘n onvergeetlike ervaring maak. Die liedjie toon die ware krag van Tino se musiekstyl en sy vermoë om emosie en kreatiwiteit in sy musiek te integreer.
Tino het sy deurbraak as musikant gemaak deur die wêreld te verower met sy tiktok videos. Hy is raakgesien deur die legendariese sanger & liedjieskrywer Jan Blohm, wat hom onder sy vlerk geneem het om sy loopbaan as musikant te begin.
Die opvolg enkelsnit, “Tassies Pak,” wys ons dat Tino nie net ‘n “one hit wonder” is nie, maar dat hy hier is om te bly. Met die sukses van sy debuut album, kan aanhangers verwag dat die nuwe liedjie net so groot sal wees. Die unieke styl van Tino se musiek maak hom ‘n kunstenaar wat maklik onderskei kan word van die res.
Die musiekvideo vir “Tassies Pak” sal ook op 7 April beskikbaar wees op Youtube. Dit is ‘n visuele uitbeelding van die liedjie, wat die emosie en die krag van die woorde in beeld bring. Die video vertoon ook Tino se kreatiewe benadering tot musiek en visuele kuns.
“Ek is opgewonde om my musiek met die wêreld te deel en kan nie wag om te sien hoe mense reageer op ‘Tassies Pak’,” sê Tino. “Dit was ‘n eer om te sien hoe ‘Afstand’ so goed ontvang is, en ek hoop dat hierdie liedjie dieselfde sukses sal hê. Ek is dankbaar vir die ondersteuning van my aanhangers en hoop om hulle te verras met meer musiek in die toekoms.”
Vir meer inligting oor Tino en sy musiek, volg hom op sosiale media en bly op hoogte van sy volgende optredes en vrystellings. Tino is ‘n opkomende kunstenaar wat ‘n groot impak op die Suid-Afrikaanse musiekbedryf gaan maak.
Dit bly ’n kunsvorm op sy eie om verskillende smake met mekaar te versoen. Partymaal kom hierdie smake uit kossoorte wat jy normaalweg eerder nie saam op een bord sou sit nie.
Daar is egter altyd daardie een persoon wat die waagmoed het om tog hierdie onbekende terrein van smake en teksture te ondersoek. Soms is die gekombineerde smake aaklig, maar soms is dit absoluut hemels.
In sy nuwe lied COCO POPS EN KAAS sing Nicholis Louw oor hierdie verskynsel en trek hy die metafoor deur na sy verhouding met sy vrou. Die lied vertel hoe onwaarskynlik sukses tussen twee uiterstes is, maar hoe dit tog kan saamwerk om iets beter te skep as wat die twee afsonderlik bied.
Louw verduidelik dat ’n nostalgiese tyd in sy lewe COCO POPS EN KAAS geïnspireer het. “Dis ’n ongelooflike kombinasie. COCO POPS EN KAAS was nog altyd my gunstelingontbytkos.”
Die lied sinspeel verder op vreemde koskombinasie wat veronderstel is om afstootlik te wees, maar waarvan die gekombineerde smaak voortreflik is.
Nicholis het die self die lied geskryf en die verwerking is behartig deur Robin Kielly. Die opgewekte lirieke, melodie en verwerking sal jou vinnig laat saamsing en (soos net Nicholis Louw se musiek kan) jou aanpor om op te spring en te dans.
Louw het vir seker geen bekendstelling nodig nie en is een van ons land se mees diverse sangers. Hierdie nuwe lied is deel van sy oorgang na die countrygenre. Alhoewel daar ooreenkomste met sy vorige musiek is, sal die lied sy bestaande aanhangers begelei tot sy nuwe klanke.
Hy verduidelik dat hy sy musikaliteit uitbrei deur na ’n verskeidenheid kunstenaars uit verskillende genres te luister en dat sy musiek veral beïnvloed word deur musikante soos Don Williams, Andrea Bocelli, Garth Brooks, Kenny Rogers en Placido Domingo.
Al trek jy jou neus op vir suiker op roosterbrood, of piesang en kaneel, sal jy hou van dit wat jy hoor met Nicholis Louw se COCO POPS EN KAAS.
Met meer as 10 albums op sy naam en verkope wat lankal reeds die halfmiljoenmerk verbygesteek het, beloof COCO POPS EN KAAS om spoedig nog ’n treffer te word.
COCO POPS EN KAAS is nou beskikbaar op alle digitale musiekstromingsdienste.
Sedert die talentvolle sanger en liedjieskrywer, Simoné Roets, in 2021 besluit het om die Afrikaanse musiekmark te betree, het sy nog net beïndruk met haar unieke outentieke styl en sielvolle aanslag.
Nie net het haar arsenaal van oorspronklike musiek skielik bo-aan verskeie radio-stasies se treffersparades gepryk nie, maar sy is ook in 2022 benoem vir ’n Aitsa-toekenning (Nuweling van die Jaar) en het tydens dié geleentheid opgetree saam met kunstenaars soos Elandré, Refentse en Demi Lee Moore.
Sy is vanjaar ook benoem vir vier Afri-Indie Onafhanklike Kunstenaartoekennings, waarvan die wenners in April aangekondig word.
Nóú het sy die volgende opwindende fase van haar loopbaan amptelik betree met die vrystelling van haar langverwagte debuut-album, en die eindresultaat is hoendervleismooi.
Wanneer jy haar uitvra oor HERINNER MY, verklap sy dat die titelsnit die eerste liedjie was wat sy in Afrikaans geskryf het toe sy nog in Australië gewoon het. Omdat dit is wat haar album-droom laat vlam vat het, het sy besluit dat dié titel baie gepas sou wees.
Die album is deur Jattie de Beer van Artistry Productions vervaardig en bestaan uit elf liedjies, wat wissel tussen akoestiese en pop-verwerkings en sorgvuldig uitgesoek is om met luisteraars se harte te praat.
“My teikenmark is mense wat lief is vir ons taal en stories,” verduidelik sy. “Ek het van die liedjies self geskryf, ander saam met Jattie en my ma was ook betrokke by die skep van ‘Sondag P.M.’ en ‘Om Elke Hoek en Draai’.”
Wat sy die meeste geniet het van die drie jaar wat dit geneem het om die album saam te stel, was om iets te skep uit niks. “Elke noot, instrument, oomblik, liriek en melodie is 100% oorspronklik – dit het lank gevat, maar ek en Jattie (en almal betrokke) is trots op die finale produk. Die vriendskappe wat ’n mens bou deur hierdie kreatiewe proses staan ook vir my uit.”
Haar gunsteling-snit op die album verander gereeld. Op die oomblik is dit Hou Vas, wat gaan oor die gedagte dat vrees (as emosie) ’n realiteit is. Sy deel: “Die liedjie is geskryf met die hoop om te bemoedig – ek dink ons kan vrede ervaar, selfs in oomblikke wat ons oorweldig voel met angs en vrees. Dis nie altyd een óf die ander nie.”
Om dinge nog meer opwindend te maak, het sy ook pas ’n nuwe enkelsnit en musiekvideo uitgereik. Die enkelsnit, Skete, ondersoek ons vermoë (of onvermoë) om in die oomblik te leef. Die inspirasie vir die liedjie is gebore uit die vraag of ons die som van ons ‘skete’ is en of dat ons werklik in die hede kan leef.
Sy voeg by: “Ons moet leer om regtig net vinniger oor goed te kom, anders mis ons ’n klomp mooi dinge langs die pad.”
Herinner My, die titelsnit, se musiekvideo deel die kunstenaar se musiekreis, vanaf haar woonstel in Brisbane – waar alles begin het – tot in die ateljee waar die album opgeneem is.
“Dit wys so ’n bietjie hoe ons gewerk het in die ateljee aan die hele album. ‘Herinner My wie ek is’ is ook van toepassing op my storie en die feit dat ek nou musiek meer doelgerig najaag,” sê sy oor die video wat by Odyssey Studio in Lynwood Bridge en Artistry Productions se ateljee verfilm is, met Adi van der Walt as vervaardiger.
Simoné het in Nelspruit groot geword en het eers op universiteit haar passie vir musiek ontdek. Sedertdien het sy ’n kortspeelplaat en verskeie ander Engelse liedjies uitgereik en was sy ook betrokke by die Hillsong City Campus in Brisbane, Australië, waar sy vir lank gewoon het.
Alhoewel sy al vir ’n geruime tyd terug is in haar geboorteland en intussen ook ma geword het van ’n pragtige dogtertjie, het sy nog geensins begin afskaal nie en geniet sy dit om met baie verskillende dinge besig te bly.
Buiten vir sing en liedjies skryf, help sy ook ’n kerk op kontrakbasis met hulle musiek, doen sy prokureurswerk en is sy ’n F45-fiksheidsafrigter – iets wat sy baie geniet, omdat sy daarin glo om aktief te bly.
Haar planne vir 2023 sluit in om soveel optredes as moontlik te doen, genoeg tyd saam met haar gesin en familie te spandeer en haarself te vestig as liedjieskrywer wat vir ander kunstenaars skryf. “Die musiekbedryf het my geleer om in my baan te bly en nie te veel rond of om te kyk nie,” sê sy.
Simoné is baie opgewonde om HERINNER MY met die wêreld te deel en hoop dat dit elkeen se hart sal raak wat daarna luister. Sy moedig ook almal wat dit hoor aan om haar te laat weet wat hulle dink.
“Dis vir my ongelooflik spesiaal om te hoor hoe my musiek iemand anders geraak het, so laat weet asseblief watter liedjie met jou praat,” sluit sy af.
Die album is nou beskikbaar op alle digitale stromingsplatforms. Laai dit hier af:
Ons hoor dikwels “Die wêreld is so klein!” Maar hoe klein is klein dan nou eintlik? Om jou ’n idee te gee … Die wêreld is so klein dat jy ’n denkbeeldige lyn van jouself af na enige ander persoon op aarde kan trek deur te begin by een van net ses van jou kennisse. Wouter van de Venter sing juis in sy nuwe lied STELLA VOOR oor hierdie kleinheid van die wêreld.
STELLA VOOR is ’n sinspeling op die woorde “stel haar voor” en vertel die verhaal van ’n liefdesoeker wat eensaam op ’n kusdorp woon. Dit is hier waar ’n nooi sy oog vang, maar hy glo dat hy, helaas, nooit met haar kennis kan maak nie.
Die liefdesoeker se lot verander een aand toe sy vriend sê dat hy sy niggie saam gaan bring na die watergat op die dorp. Die niggie heet “Stella” en hy gryp die geleentheid aan deur grappenderwys aan sy vriend te sê: “Waarvoor wag jy? STELLA VOOR!”
Wouter vertel dat die lied sy oorsprong het te danke het aan hul hond, Stella. Die idee vir STELLA VOOR het juis posgevat toe ’n goeie vriend by hom gekuier het en skertsend gesê het: “Stella, wel STELLA VOOR!”
Soos met sy vorige musiek skroom Wouter nie om met fyn deurdagte lirieke stories te vertel nie. STELLA VOOR is eg aan Wouter se musiekstyl. Luisteraars wat reeds lief vir sy musiek is, sal hierdie lied verwelkom.
Aanhangers kan ook uitsien na die musiekvideo vir STELLA VOOR. Dit vertel die storie wat in die lied afspeel en is verfilm by Die Watergat op Langebaan. Die konseptualisering, teks, regie en vervaardiging van die video is deur Wouter self behartig.
Wouter beskryf die vervaardigingsproses as senutergend, aangesien hy moes bontstaan as musikant, vervaardiger, regisseur en akteur. As jy vir hom vra wat die lekkerste van die proses was, antwoord hy: “Daai brandewyn en Coke wat jy drink sodra die hele storie klaar geskiet is.”
Wouter het reeds groot bekendheid met sy musiek verwerf en beskryf sy vrou as sy grootste inspirasie, alhoewel hy ook inspirasie kry by musieklegendes soos Sting, Koos Kombuis en Anton Goosen.
Na 30 jaar in die musiekbedryf spog Wouter met ’n reeks treffers, soos AS DIE HIPPIES BEGIN DANS, MY BOK en SONNEBLOM.
Wanneer Wouter nie besig met sy eie musiek is nie, vervaardig hy talle ander kunstenaars se albums in sy studio (Weskus Studios). Tans is hy druk besig met Armand Steenkamp se nuwe album wat binnekort die lig gaan sien.
Wouter, ’n boorling van Gqeberha (Port-Elizabeth), se talente is deur Jannie du Toit ontdek wat hom ook gehelp het om sy eerste twee albums (VOEL VERE en DONKERKANT) uit te reik. Danksy Jannie du Toit het hy kennis gemaak met wyle Christa Steyn saam met wie hy vir jare lank ’n studio bedryf het.
Alhoewel Wouter al ’n geruime tyd in die bedryf is, is hierdie maar net die begin.
STELLA VOOR is reeds beskikbaar op alle digitale mediaplatforms. Laai dit vandag nog af en luister daarna!
Partymaal in jou lewe onmoet jy daardie een persoon wat jy net nie uit jou kop kan kry nie. Wat ookal jy probeer doen om jou aandag van hierdie persoon af te lei is tevergeefs. So persoon neem hul plek in in jou gedagtes sonder toestemming. Dis asof hulle daar bly sonder om huur te betaal, as’t ware leef hulle HUURVRY.
Die manne van ADAM is weer terug in die kollig en die keer gaan jy saamsing. Hul nuutste enkelsnit, HUURVRY, stuur die groep se klank in ‘n nuwe rigting wat weereens dié groep se musikale vernuf onderstreep.
“HUURVRY handel oor daardie persoon wat die volle omvang van jou gedagtes opneem. Hy/sy neem jou, soms sonder opset, op ‘n emosionele pretrit.”, verduidelik Christoff de Beer wie verantwoordelik is vir die skryf van die lied.
Die vervaardiging is behartig deur die gesoute span van MUSE Studios, Hugo Ludik en Brendan Campbell. Met HUURVRY ondersoek die groep ‘n nuwe klank wat goeie variasie tot hul bestaande repertoire voeg. Die dreunsang aard van die lied sal luisteraars wat soortgelyke emosies ervaar aanpor om saam te sing.
ADAM het reeds kennis gemaak met die publiek in 2009 en met 7 albums en 4 enkelsnitte later het die groep talle treffers tot die Afrikaanse musiekgenre gevoeg. Van hul grootste treffers sluit in: SAL OORLOG VIR JOU MAAK, HOOGTEVREES en LIEFDE SOLDAAT.
Die groep bestaan uit drie lede, Kyle Grant, Christoff de Beer en Hugo Ludik. Saam het hulle reeds duisende mense regoor Suid-Afrika met hul indrukwekkende drieledige harmonië vermaak op verskeie geleenthede. Saam spog die groep met 9 Ghoema’s asook ‘n SAMA-toekenning in die kategorie “Beste POP album in Afrikaans”.
Om ADAM se musiek op te som in een woord sal “oorspronklik” die beste woord wees om te gebruik. Elke lied en album wat deur die groep uitgereik word is vars, relevant en blywend. Min kunstenaars kry dit reg om deur die toets van tyd staande te bly soos ADAM. HUURVRY is weereens ‘n bewys dat die drie manne musikante in murg en been is. Eg aan hul aanpasbare aard wyk hierdie lied nie van hul norm af nie.
HUURVRY sal die tweede enkelsnit wees wat die groep uitreik in samewerking met VONK musiek. Die eerste was die treffer ROOI LIPPE wat gepryk het op talle trefferparades en speellyste op al wat ‘n radiostasie en stromingsplatform is.
Die lede van die groep verduidelik dat die arbeider sy loon werd moet wees en daarom spandeer hul self 4 ure of meer per dag om hul musiek te bemeester. “Soos met enige bedryf is dit die een wat die hardste werk wat die wa deur die drif trek.”, verduidelik hulle.
Of jy al kennisgemaak het met ADAM of nie, is HUURVRY ‘n liedjie vir jou. Om ‘n rooigesig te voorkom by jou volgende sosialegeleentheid, stel ons voor jy raak vertroud met die lirieke, want dié lied gaan nog baie gespeel word en saamsing is nie-onderhandelbaar nie.
HUURVRY is nou beskikbaar op alle digitale mediaplatforms.
Daar is so baie dinge wat deesdae in ons land skeefloop, dat dit belangrik is om ten minste iets te hê waarop jy kan staat maak.
Vir Jan Rhaap is daardie “iets” beslis sy bakkie, want wanneer hy nie op die verhoog is nie boer hy op sy familieplaas in die Noordkaap.
Dié sanger en liedjieskrywer se nuutste enkelsnit is gebore nadat hy vir ’n rukkie met sy broer se 2.4D-bakkie moes ry en so beïndruk was dat hy besluit het om op sy besonderse manier hulde te bring aan wat, volgens hom, een van die beste enjins is wat nog ooit gemaak is.
2.4D, wat oudergewoonte deur Tertius Human van Coolerbox Studios vervaardig is, kan beskryf word as ’n lekkerluister country-nommertjie wat met enige bakkie-liefhebber se hart sal praat.
“Afrikaners is lief vir hul bakkies en daar is gereeld kompetisie tussen manne oor wie se bakkie nou eintlik die beste is. Hierdie lied gaan presies daaroor; ’n man wat trots is op sy bakkie,” vertel hy. “Soos al my liedjies, is hierdie een ook baie spesiaal. Ek boer self, en enige boer se bakkie speel ’n baie belangrike rol op die plaas en in sy lewe.”
Die musiekvideo, wat nou op die kassie te sien is, voer die tema verder en is gebou rondom die idee dat ’n boer sy bakkie vir alles gebruik.
“In die video sien ons ’n man wat van vroegoggend tot laatmiddag in sy bakkie rondry,” verduidelik die musikant. “Langs die pad ontmoet hy verskillende karakters en elkeen word deur ek self vertolk.”
Wian van der Walt het die video, wat op ’n plaas buite Schmidsdrift in die Noordkaap verfilm is, vervaardig.
Jan Rhaap, met sy rasperstem en opgewekte musiek, vermaak gehore al vir meer as ’n dekade en is veral bekend vir treffers soos Huisie in die Bos, wat hy saam met Juan Boucher geskryf het en waarvan die video reeds meer as 4.6-miljoen kyke op YouTube gehad het, Jan Ek Kan Nie Dans Nie met meer as 2.1-miljoen kyke en Ramskilpad wat op verskeie treffersparades gepronk het en ook reeds deur meer as 1.5-miljoen mense gesien is. Die video van sy vorige vrystelling, Jagvat, is ook reeds meer as 500 000 gekyk.
Hy kom uit ’n baie musikale gesin en het oor die jare verskeie loopbaanhoogtepunte gehad, waaronder Ghoema-benoemings vir Nuweling van die Jaar (2015) en Beste Alternatiewe Album van die Jaar (2017). Hy het pas ook saam met ander bekendes op die 2023-Bokboot gekuier.
Wanneer hy nie sing of boer nie, geniet hy dit om tyd saam met sy vrou en twee kinders te spandeer, saam met vriende en familie te kuier en hy het selfs vroeër vanjaar weer begin krieket te speel.
Jan, oftewel Werner Burger, is lief vir sy taal en kultuur en hou daarvan om te sing oor dit wat Afrikaners na aan die hart lê. Met 2.4D wys hy net weereens dat hy presies verstaan wat dit is.
Hierdie liedjie is die tweede vrystelling vanaf sy kortspeelplaat (Jagvat) wat einde laas jaar uitgereik is.
Stories bevat keer op keer lewenslesse waaruit jy kan leer. Sonder oorvertelling sal stories ongelukkig uitsterf. Daarom is dit belangrik dat ons ons stories aan die lewe hou deur dit aan ons nageslag te vertel. Veral stories oor ons erfenis, want daarsonder verloor ons sin vir wie ons is en waarheen ons op pad is.
Met hul nuutste album, ERFENIS, maak Die Teelepeltjies seker dat hulle jou weer aan jou herkoms herinner met twaalf varsgebakte Boeremusiektreffers saam op een album.
Die groep gebruik hul diverse en kleurryke klank om boeremusiek weer terug te sit op die radiogolwe. Hulle vars en moderne aanslag sal jou sommer opnuut verlief maak op jou ERFENIS en die boeremusiekgenre.
Die groep bestaan uit Paul Bester, Johnny Volbrecht, Ziaan Hattingh en Christiaan Ras. Hulle unieke klank word verder op hierdie album versterk deur puik konsertina- en banjospel deur Regardt de Bruin en Ernie Bates as gaskunstenaars.
“Dis ’n album wat jou gaan terugneem in tyd en ou herinneringe by jou gaan wakker maak. Jy gaan verlang na mense van vroeër in jou lewe, maar terselfdetyd gaan dit jou voete aan die jeuk kry om te wil dans,” vertel Christiaan.
Die Teelepeltjies het reeds in 1989 ontstaan toe Christiaan se pa hom geleer het hoe om Boeremusiek te maak. Sy broer, wat die drome gespeel het, het toe nog nie ’n dromstel van sy eie gehad nie en moes met twee teelepels op ’n verfblik speel. Vandaar die Die Teelepeltjies.
ERFENIS is die groep se negende album en is vervaardig deur Kobie Koen van Vonk Musiek, terwyl Ernie Bates die opname behartig het. Elke lied is goed deurdink en die uitvoering is haarfyn beplan. Dit gee aan elke lied genoeg meriete om op sy eie te kan staan.
Boeremusiekliefhebbers kan uitsien na ’n paar bekende treffers soos die KALFIEWALS en SUIKERBOSSIE, maar kan ook uitsien daarna om verras te word met ’n FAK-KEURSPEL, WILLEM SE VASTRAP en VYEJAM SETIES. Die groep beplan om ook vier nuwe musiekvideos’ vir die album uit te reik.
Tussen die vier lede is daar oorgenoeg variasie in instrumentasie en talent om jou ore vir ure lank te prikkel. Daar is iets vir elkeen om te geniet: ritmekitaar, melodika, klawerbord, dromme, trekklavier, banjo en baskitaar, om net ’n paar instrumente te noem.
Met ERFENIS gaan Die Teelepeltjies sonder twyfel sommer in die nabye toekoms die dansvloere by talle feestelikhede aan die gang kry. Soos die reuk van varsgebakte brood jou honger maak, sal hierdie album jou lus maak en laat vra vir nog meer.
ERFENIS is nou beskikbaar op alle digitale platforms. Luister dit hier:
Zoé het op ‘n plaas net buite Tzaneen groot geword en het van kleins af ‘n liefde vir musiek gehad. ‘’My ma-hulle vertel altyd nog voor ek kon praat het ek alles gesing en ek het altyd my eie liedjies opgemaak. My sussie het my betrokke gemaak met kultuur en danksy haar sing en dans ek my hele lewe lank al,’’ vertel sy.
Behalwe vir hoërskool serenade en om hier en daar na bands te gaan luister in iemand se motorhuis was daar nie veel geleenthede om haar passie vir musiek uit te leef nie, so Zoé het begin kuns gee by Hoërskool Ben Voster terwyl sy vir haar onderwys graad studeer het. ‘’Ek het vir die Kontrak ingeskryf, maar ek het dit net tot by die top 10 gemaak en aanvaar dat dit ‘n teken was.’’
Zoé het weer haar pos ingeneem by die skool, maar ‘n vreemde samevoering van gebeure sou sorg vir ‘n teken dat ‘n loopbaan in musiek wel vir haar bedoel is. Sy het as ‘n grap die woorde van ‘n Rainbow Kitten Surprise liedjie in Afrikaans oorgeskryf. Sy en ‘n vriendin het dit opgeneem en dit vir haar kuns onderwyser aangestuur om haar opinie te kry. Haar kuns juffrou het dit vir haar skoondogter aangestuur wie by ‘n TV produksie maatskappy werk wat kantore met ‘n platemaatskappy deel en toe gebeur die onverwagse.’’
‘’Ek was besig om klas te gee en toe lui my foon. Ek het nie die nommer herken nie en maar besluit om te antwoord. Die volgende oomblik het iemand my genooi om met die eienaars van CoolerBox Records te ontmoet.’’ Zoé het versigtig opgewonde Johannesburg toe gery om ‘n audisie by die platemaatskappy af te lê. ‘’Ek het vir hulle die cover-liedjie gesing en hulle het my huis toe gestuur met huiswerk. Ek het huis toe gegaan en myself uitgedaag om drie liedjies te skryf en ‘n maand later het ek my tweede oudisie afgelê,’’ deel sy.
Zoé is ateljee toe en het aan die drie liedjies begin werk saam met musiekvervaardiger, Tertius Human en het haar 2Oste verjaarsdag saam met haar ma Louisa en Tertius in die ateljee gevier, terwyl sy Crazy meisie opgeneem het.
Zoé wie al haar liedjies self skryf meen dat, Crazy Meisie ‘n belangrike boodskap het. ‘’As ‘n vrou passievol is word sy maklik mal genoem, maar as ‘n man dieselfde optree, wel dis nie eers iets waaroor ek wil praat nie,’’ lag sy. ‘’Ek is jaloers, ek is impulsief en ek maak foute, maar as jy my nie met al my foute wil aanvaar nie moet jy my uitlos. Jy moet iemand aanvaar vir hulle goed en sleg,’’ vertel sy. Die liedjie sluit af met die lirieke; ‘’Daar’s iemand anders wat al beter pas in jou plek en dit is ek.’’ ‘n Boodskap wat Zoé hoop jong meisies ter harte sal neem. ‘’Die enigste persoon wie se goedkeuring jy nodig het is jou eie’’, het sy vertel.
Crazy Meisie, se musiekvideo is ook nou beskikbaar en was vir Zoé een van haar hoogtepunte ‘’Dit was ongelooflike harde werk, maar in die dieselfde asem was dit so vinnig verby. Ek voel so bevoorreg, want hierdie tipe ding gebeur nie met mense nie,’’ lag sy.
Zoé is reeds besig met nuwe musiek en intussen is sy en haar band besig om te oefen vir haar eerste vertonings. ‘’Ek sien geweldig uit na die volgende hoofstuk. Ek voel geseënd om saam met mense te werk, wat my toelaat om my kreatiwiteit uit te leef, wat my laat deel in die besluite en wie my toelaat om te eksperimenteer en nie in ‘n boksie probeer druk nie. Vrouens is kompleks, ons wil nie een ding wees nie, ons wil alles wees,’’ sluit sy af.
Crazy Meisie is nou beskikbaar op alle digitale platforms.
Op haar sterfbed skryf Zaan Sonnekus se ma ’n paar laaste gedigte. Een van die versreëls lui: “monitor my skuldgevoelens die gesondheidsrisiko is fataal.” Hierdie woorde sou later die vuur aan die brand steek vir Zaan Sonnekus se nuwe enkelsnit MONITOR.
Almal van ons het al gevrees dat ons dopgehou word. In die moderne wêreld raak dit al hoe makliker vir iemand om jou doen en late te volg. Jy word gemonitor op sosiale media, by jou werk, die skool en nog te meer wanneer jy iets doen wat in die publieke oog gaan beland. Jy verloor alleenreg op jou bestaan.
MONITOR vertel die storie van ’n paartjie wat mekaar ontmoet onder ongunstige omstandighede. Alhoewel hul perfek was vir mekaar, het die dinge rondom hulle die verhouding teegewerk. Elke keer wanneer jy jou hart of gevoelens met ’n ander deel, raak dit hulle s’n om te MONITOR. Partymaal is die verantwoordelikheid hiervan net te veel – soos Zaan se ma geskryf het, dit is “fataal”.
MONITOR is vervaardig deur Tertius Human van VONK Musiek. Alhoewel die lied as alternatiewe rock beskryf kan word, sal die ligte pop elemente gehore buite die genre interesseer. Anders as Zaan se vorige musiek, eksperimenteer hy met ’n ligter tema wat aanklank sal vind by nuwe gehore. Die lied het die potensiaal om spoedig ’n gunsteling op radiostasies regoor Suid-Afrika te word.
Zaan het homself in 2021 as ’n gedugte liedjieskrywer bewys met sy debuutalbum, ZONNEBLOM. Met dié album het Zaan sy stempel gemaak op die Afrikaanse luisteraars en het hy spoedig ’n huishoudelike naam geword. Met treffers soos EK KAN NET BID, TIENERKWAAD en TEN MINSTE VIR MY het hy dit reggekry om woorde te bring waarna ander gesoek het.
Zaan verduidelik dat sy ma, wat self ’n skrywer was, een van sy grootste invloede was. Hy geniet musiek en skrywes wat die dieper dinge van die lewe ondersoek. Van sy gunstelingdigters sluit in: N.P. van Wyk-Louw, D.J. Opperman en Breyten Breytenbach.
As dit by musiek kom, luister hy graag na Francois van Coke, Karen Zoid, Koos Kombuis en Klopjag, maar as dit by sokkiekom, trek hy graag die Kurt Darren-treffers nader. Hy het egter sy liefde vir musiek al in graad 1 ontdek. Sy vriend het vir hom ’n CD van Green Day present gegee. Vir die volgende twee weke sou hy elke sekonde wat hy kans kry op sy sussie se CD-speler daarna luister.
Zaan se opregte lirieke en opregte musiek is ’n vars bries in ’n wêreld waar dit voel of almal jou ’n rat voor die oë probeer draai.
Dié musikant het reeds baie vermag in die musiekwêreld, maar hy warm nou eers op. Zaan is op pad om spoedig sy naam onder die musieklegendes van Suid-Afrika te vestig. Hy is sonder twyfel ’n kunstenaar wie se loopbaan jy gerus kan MONITOR.
MONITOR is nou beskikbaar op alle digitale platforms.
Thys Nortje is ‘n opkomende kunstenaar met ‘n liefde vir musiek wat homself bekend gemaak het as “die ou met die kitaar”.
In ‘’Skryf’’ sing Thys oor ‘n paartjie wat verlore voel in die wêreld, maar hulle vind mekaar en loop saam die pad. Hy verwys na die woorde “So ek skryf jou naam teen my mure uit, hierdie mense dink dalk ons is mal, maar jy verstaan my”. Die liedjie is ‘n intieme en persoonlike uitdrukking van die liefde en verbondenheid tussen twee mense.
Thys is gebore in Pretoria, maar het grootgeword op ‘n plaas in die Vrystaat. Sy liefde vir musiek het begin toe hy graad 3 was en sy ma ‘n klavier vir sy sussie gekoop het. Hy het later self kitaar begin speel en sy eie liedjies begin skryf.
Na die voltooiing van sy hoërskooljare het Thys besluit om rekenaar-ingenieurswese te gaan studeer, maar sy passie vir musiek het hom nooit losgelaat nie. Hy het deelgeneem aan Die Nuwe Baadjie-kompetisie van Jannie du Toit, wat hom in kontak gebring het met die mense van Vonk Musiek. Dit het hom aangemoedig om sy musiekloopbaan meer ernstig op te neem, en hy het onlangs sy eerste EP, “Skryf”, opgeneem wat later bekend gestel gaan word.
Die Skryf EP is ‘n versameling van persoonlike liedjies wat Thys oor die jare geskryf het. Die opnamesessies het net ses dae geduur, maar Thys het baie geleer van sy ervaring met Tertius Human in die ateljee.
Thys se talent vir musiek, lirieke en sy eerlike, persoonlike benadering tot sy musiek maak hom ‘n kunstenaar om dop te hou. Sy nuutste enkelsnit, “Skryf”, is ‘n hartroerende en mooi uitdrukking van die krag van liefde en verbondenheid.
