CHRISTIAAN BAARTMAN SE NUUTSTE ENKELSNIT, ‘BAARD SOOS ‘N KAPTEIN’ BRING HUMOR EN KUIERGEES NA DIE VOORGROND:

Suid-Afrikaanse liedjieskrywer en musikant, Christiaan Baartman, is bekend vir sy diepsinnige en emosioneel gelaaide musiek, maar sy nuutste enkelsnit bring ‘n speelse, tong-in-die-kies wending. Op 1 November 2024 stel Baartman sy jongste treffer, ‘Baard Soos ‘n Kaptein’, vry – ‘n voetstampende lied wat net in tyd vir die Desember-vakansie arriveer op alle digitale platforms.

Geïnspireer deur ‘n grappie tussen Christiaan en sy vriende, gaan die lied oor die idee dat ‘n baard alle probleme kan oplos. “As jy iets nie regkry nie, groei net ‘n lekker baard, en die probleem sal homself uitsorteer,” grap Baartman. ‘Baard Soos ‘n Kaptein’ verwys humoristies na die stereotipe dat elke man wat die grootse manlike dinge aanpak – of dit nou braai, visvang, of jag is – waarskynlik ‘n baard moet hê soos ‘n kaptein. Die lied laat ‘n mens glimlag en herinner luisteraars dat dit heeltemal aanvaarbaar is om jou bakkie te koester en saam met vriende by die plaaslike kroeg te kuier.

“Ons word deesdae deur soveel idees oorweldig oor wat ‘n man moet wees, maar soms moet ‘n man net ‘n man kan wees,” sê Baartman. “Dis maar net ‘n ou grappie, maar ek is baie lief vir my baard en glo enige man wat wil, moet sy baard kan groei.”

‘Baard Soos ‘n Kaptein’ is Baartman se 22ste vrystelling in die afgelope vyf jaar en is vervaardig in sy eie ateljee, ‘Bearded Man Studios’. Die snit is die resultaat van samewerking met van die beste musikante, insluitend Jason Moser op tromme, Juan “Floors” Oosthuizen op kitare, Albertus Malan op saxofoon, “Buddy” Johannes PA Marais op banjo en konsertina, Andrew Roman “Rixy” op baskitaar, en Joshua Oosthuizen van ORIISON Studio op bykomende kitare en klankversorging.

Met meer as twee dekades in die musiekbedryf en talle prestasies op sy kerfstok, bly Baartman se grootste passie om musiek te skep wat mense laat voel – of hy nou jou hartsnare bespeel of jou laat giggel met ‘n snit soos ‘Baard Soos ‘n Kaptein’.

Baartman het ook groot planne vir 2025, wat die 100 jaar herdenking van Afrikaans as landstaal se amptelike erkenning vier. Al kan hy nog nie te veel verklap nie, beloof hy vele nuwe musiek en projekte wat die opwinding van sy passie vir Afrikaans en musiek sal uitdruk.

Hy sluit af met ‘n knipoog en sê: “Soms moet ‘n man net ‘n man kan wees. Ag mamma, laat hom maar ‘n baard groei vir Desember, asseblief.”

Hou dop vir die snit ‘Baard Soos ‘n Kaptein’ wat verseker die partytjies hierdie somer sal aandryf! Gaan luister gerus die lied by hierdie skakel – https://vyd.co/BaardSoosNKaptein