RYNO VELVET SE ENKELSNIT “STERREVAL” BRING DIE HEELAL NADER

Die bekroonde Suid-Afrikaanse kunstenaar en musikant, Ryno Velvet, stel met groot opgewondenheid die musiekvideo vir sy enkelsnit “Sterreval” vry, op die 1ste November 2024.

“Sterreval” vertel die storie van liefde en hoe dit vergelyk kan word met die buitenste ruim wat groter is as wat ons besef. Die skryfproses vir “Sterreval” was besonders spesiaal vir hom. “Dit was een van daardie liedjies wat vinnig gevorm het – soos om ‘n insiggewende boek te lees en jouself binne ‘n oogwink alweer op die laaste bladsy te bevind,” sê Ryno.

Met die video het die span gepoog om ‘n eerlike en opregte uitbeelding vir die gehoor te skep. “Hierdie keer wou ons graag die gehoor nooi om te sien hoe dit lyk agter die skerms. Die span mense wat deel vorm van die video is mense met wie ek te doen het op ‘n daaglikse basis en deel is van die binnekring van hierdie projek. Daar is nie veel ‘voorgee’ hier betrokke nie… behalwe dat ons dalk ons hare twee keer ekstra gekam het, net om darem netjies te lyk,” skerts Ryno. In die opname van hierdie video het die musikante regtig die liedjie lewendig opgevoer. Die video-opname het plaasgevind in Intello Acoustics se stoorkamer, waar daar gereeld repetisies plaasvind voor groot Ryno Velvet vertonings.

Op 1 November kan jy uitkyk vir “Sterreval” se musiekvideo deur om Ryno Velvet se amptelike sosiale media platforms dop te hou óf om te loer op die Vonk Musiek YouTube Kanaal.

Geniet die enkelsnit en musiekvideo op die platform van jou keuse –  https://linktr.ee/rynovelvet