Author: Ashley Du Toit

Die talentvolle sanger en liedjieskrywer Hendré Baard meer bekend as die voorsanger van die geliefde rock-groep Millennium het sy solo-loopbaan afgeskop met die kragtige nuwe enkelsnit “Met Jou Hier” – ’n eerlike en ontroerende lied wat oor die waarheid van lewe, liefde, en foute handel. 

In “Met Jou Hier” bied Baard ’n stukkie van homself, hy gebruik sy lirieke om sy reis van jeug, verlossing en die rol wat geliefdes in sy lewe speel te beskryf. Die lied vang die emosies van saam met iemand spesiaal wees vas en weerspieël die idee dat die lewe, al is dit soms chaoties en onvolmaak, steeds die moeite werd is.

Baard hoop dat sy aanhangers hulself in die lirieke van “Met Jou Hier” sal herken en dat die lied sal aanmoedig om in die hede saam met hul geliefdes te leef en die lewe in al sy fasette te waardeer. Met ’n stylvolle klank en egtheid in sy lirieke, is “Met Jou Hier” ’n treffende toevoeging tot Hendré se groeiende musiekrepertoire.

Baard hoop dat “Met Jou Hier” die mense sal  inspireer om vreugde te vind in saamwees en om die lewe saam met hul geliefdes ten volle te geniet.

Die oorsprong van “Met Jou Hier” lê langs die kalm see van Jongensfontein, waar Hendré die liedjie geskryf het. “Ek wou iets skep waarmee mense kan vereenselwig – veral diegene wie se geliefdes ver weg is,” sê hy. “Fred Den Hartog se unieke bydrae het die klank van hierdie snit uitgelig en dit onderskei van my vorige werk.” Hoewel die produksieproses glad verloop het, moes Baard ’n paar aanpassings maak, insluitend om die lied effens te verkort en woorde uit te haal om die kernboodskap sterker te laat deurkom.

“Met Jou Hier” is vir Hendré meer as net ’n liedjie; dit is ‘n refleksie van sy persoonlike groei as kunstenaar en sy waardering vir die lewe – foute ingesluit. “Ek leer uit my foute, en soms moet mens vasbyt en ander kere moet jy laat gaan. Maar die lewe bly lekker, veral vir mense soos ek… met jou hier,” sê hy.

“Met Jou Hier” is die eerste enkelsnit van ’n volledige album, Baard se aanhangers kan met opgewondenheid uitsien na ‘n volle album wat oppad is. Hierdie album beloof om diep en lewensgetrou te wees en om luisteraars aan te moedig om saam met Hendre te geniet en oor die vreugdes en uitdagings van die lewe te besin.Hou dop vir “Met Jou Hier” op alle musiekplatforms, en maak gereed om saam te sing, te dans, en die dieper waarhede van die lewe saam met Hendre Baard te vier.

Deon Groot, die geliefde Afrikaanse sanger, stel op 29 November 2024 sy nuutste enkelsnit, VAT HAAR HUISTOE (na mamma toe), bekend – ‘n vrolike liedjie wat luisteraars op ’n avontuur van romanse en humor neem. Na Mamma vertel die verhaal van ‘n enkelman op soek na sy “perfekte” lewensmaat, terwyl hy sy ouers se raad in ag neem en hulle advies oor ‘n goeie vrou op ’n speelse manier ondersoek. Met lirieke wat gesels oor die klein dingetjies wat regtig saak maak, vang hierdie liedjie die belangrike ooblike van verhoudings vas.

Deon beskryf die lied as ‘n “speelse kommentaar op hoe mans en vroue mekaar sien en verstaan – soms ernstig, maar meestal met ’n knipoog!” In die lied, wens hy dat sy toekomstige vrou bietjie kan kook, ‘n braaivleisvuurtjie kan aansteek, en selfs kan saamgesels oor die kleintjies se boeke en huilende kinders troos. “Ek het na my vrou gekyk en gesê, ‘Dis mos wat ’n man wil hê,’” lag Deon. “En dit het die inspirasie gewek om dit verder te neem en selfs ons skoonouers se wyshede in die lied te verwerk.”

Met sy speelse lirieke en ’n aansteeklike refrein, beloof VAT HAAR HUISTOE (na mamma toe), om ’n gunsteling op die dansvloer te word. “Ek wil hê mense moet hande vat, saamsing en die humor van verhoudings omhels – presies soos met Hou My Dop,” sê Deon. Dié snit bring Afrikaanse musiek op sy vrolikste en is geskep om mense te laat glimlag, te laat dans, en om die klein oomblikke wat verhoudings spesiaal maak, te vier.

Die snit is geïnspireer deur die styl van Worsie Visser, met klankinvloede van Johannes Kerkorrel, wat Na Mamma toe ‘n vars, eg Afrikaanse klank gee – die soort wat Deon se aanhangers altyd waardeer. “Ons het daardie unieke Afrikaanse ritme en toon by die snit ingewerk om die mooi en humor van verhoudings te beklemtoon,” sê Deon oor die kreatiewe proses agter die lied. “Ek hoop mense hoor die lighartige oomblikke en besef dit is regtig wat saak maak.”

VAT HAAR HUISTOE (na mamma toe), is 29 November 2024 beskikbaar op alle digitale platforms en bring die perfekte balans tussen romanse en humor. Deon se aanhangers kan uitsien na nog musiek wat nie net vermaak nie, maar ook ‘n viering van Afrikaanse kultuur en die diepte van verhoudings beloof.

Geniet die liedjie op die platform van jou keuse:

PUBLISITEIT & BEMARKING :

Vonk Musiek

Ashley Du Toit

Sel: 083 963 3055

E-pos: ashley@vonkmusiek.co.za

Kyra Grobler

Sel: 072 107 0069

E-pos: kyra@vonkmusiek.co.za

E-pos: pr@vonkmusiek.co.za

PLATEMAATSKAPPY :

Vonk Musiek

Francois Roux

Tel : 011 823 1771 / 061 312 2160   

E-pos : francois@vonkmusiek.co.za

Webwerf: www.vonkmusiek.co.za

Dozi, ‘n geliefde en bekende in Suid-Afrikaanse musiekkringe, reik sy nuutse enkelsnit: Muis van Potchefstroom uit. Hierdie tong-in-die-kies liedjie bring hulde aan ’n unieke karakter wat diep spore in die harte van Potchefstroom se gemeenskap getrap het.

Die liedjie vertel die storie van Piet, beter bekend as “die Muis,” ’n polisieman wat meer as net sy plig gedoen het. Hy was geliefd onder die dorp se inwoners, veral die studente, en sy lojaliteit aan sy gemeenskap en dorp het hom ’n plaaslike held gemaak. Of dit nou was om ‘n spoedkaartjie te laat verdwyn of ’n hand uit te reik waar nodig, Piet het ’n onvergeetlike impak op almal om hom gehad.

Met beeldryke lirieke en ’n vrolike deuntjie, beskryf Dozi die avonture van hierdie stoutgat karakter. Die lied nooi luisteraars om saam te kuier, herinneringe te deel, en lekker te dans op die klanke van nostalgie en humor. Dozi vertel van sy dae by Bourbon Street waar hy in die 80’s opgetree het “Piet was alreeds in die kroeg as ek daar aangekom het, Hy het my kom help uit pak voor die show, as hy klaar gehelp het, het jy hom weer in sy hoek gekry waar hy gesit het. Piet het ook so nou en dan help op pak as die show klaar was, Muis van Potchefstroom vang die essensie van ’n era en ’n gemeenskap vas.

“Hierdie een is vir die gemeenskap. Dit herinner ons hoe belangrik lojaliteit is en hoe ons elkeen ’n verskil kan maak in die lewens van mense om ons. Maar dis ook net pure lekkerkry – ’n dansbaan-treffer wat mense sal geniet!”

Met sy aansteeklike refrein is die liedjie perfek om enige fees op dreef te kry:

Muis, Muis, Muis, Muis van Potchefstroom,
Die meisies like hom kwaai as die winde sy hare waai,
Dronk, dronk, dronk, Piet Muis val rond,
Hy’s die stoutgat muis daar van Potchefstroom!

Die snit, beskikbaar op 29 November 2024, sluit tradisionele Afrikaanse musiekinstrumente soos die konsertina in en kombineer sterk  invloede met Dozi se kenmerkende storievertelling. Dit is ’n viering van lojaliteit, musiek, en ’n stoutgat oom wat almal se harte gesteel het.

Dozi beplan om sy kenmerkende styl voort te sit met ’n reeks nuwe enkelsnitte wat luisteraars sal laat glimlag, dans en terugverlang. Maak gereed vir meer treffers wat die dansvloere sal vol maak en die gees hoog sal hou!

Bly op hoogte vir meer nuus en musiek van Dozi – laat ons saam kuier met die Muis van Potchefstroom!

Geniet die liedjie op die platform van jou keuse: https://vyd.co/MuisVanPotchefstroom

Die geliefde Afrikaanse duo, Vrede, bring op 15 November 2024 hul nuwe enkelsnit, Hemel Op Die Aarde, na vore – ‘n sielvolle en eerlike lied oor hoop, tuiste, en die diep, persoonlike vrae waarmee baie Suid-Afrikaners stoei. Hierdie uitreiking beloof om luisteraars mee te voer op ‘n musikale reis wat vrae stel oor ons toekoms, die betekenis van tuiskoms, en die wens om ‘n toekoms te bou in Suid-Afrika, ten spyte van al die uitdagings wat daarmee saamgaan.

Volgens een van die lede van Vrede, Storm Opperman, verken die lied die vraagstukke en drome wat mense het oor hul toekoms, en spesifiek die toekoms van Suid-Afrika. “Soos mens ouer raak, begin jy vrae vra oor die toekoms van ons land. Om ‘n nuwe lewe elders te bou verg tyd en die besluit om dit aan te pak, moet nou geneem word. Hierdie lied spreek tot die huidige oomblik en plek waar ek myself bevind.”

Storm noem verder dat die liedjie mense wil aanmoedig om te waardeer wat ons in Suid-Afrika het. “Elke land het sy uitdagings, maar hoop is deel van ons identiteit. Dit help ons om ‘n positiewe uitkyk te hê en die jeug aan te moedig om slim keuses vir die toekoms te maak,” verduidelik hy. Die duo het vir hierdie lied op ‘n unieke klank besluit deur elemente van verskillende genres te verken. Tertius Human, van Coolerbox Studios, het hulle bygestaan met sy kundigheid in die produksieproses, waarvoor die duo hom baie dank verskuldig is. Storm merk verder dat Spoegwolf, ‘n groep waarvan hy ‘n groot aanhanger is, ‘n inspirasie in die klank van Hemel Op Die Aarde gebring het.

Francois Roux, die ander lid van Vrede, se reis deur die wêreld het ook baie vrae in hom laat ontstaan oor die toekoms in Suid-Afrika. “Die gras is nie altyd groener aan die ander kant nie. Elke land het sy eie uitdagings, en ons lied wil daardie gedagte aan die luisteraar oordra,” sê Francois. Hy verduidelik dat die lied die groei weerspieël wat hulle as kunstenaars ervaar het en hul verbintenis tot Afrikaans as moedertaal versterk.

Hemel Op Die Aarde is ‘n lied oor saamwees, oor die keuse om in Suid-Afrika te bly en ‘n toekoms te bou hier, omring deur geliefdes en in ‘n kultuur wat diep in die hart van die duo lê. Deur die lirieke, soos “Bring my vrede waar die engele sing” en “Dis hemel op die aarde,” hoop Vrede om luisteraars aan te spoor om te bly hoop en ‘n tuiste hier te vind.

Vrede hoop dat die luisteraars ‘n gevoel van samesyn en verbinding met die musiek sal ervaar. Die duo mik om met hierdie snit die kuns en diepte van Afrikaans as ‘n veelsydige genre verder uit te bou en te bewys dat Afrikaans se musiek nie net ‘n kommersiële genre hoef te wees nie. Hulle werk saam met Coolerbox Records en is dankbaar om met vriende soos Tertius Human van Coolerbox Studios te kan saamwerk om dieper betekenis aan die Afrikaanse musieklandskap toe te voeg.

Die Twee krul koppe het hulle debut verskyning gemaak in die sepie “ Die Fakulteit” wat op sondae 19:30 op eExtra (openview kanaal 105 & Dstv kanaal 195)  uitgesaai word en is ook beskikbaar op evod.

Vrede se aanhangers kan uitsien na nog musiek in die toekoms. Die duo keer binnekort terug na die ateljee vir hul volgende projek, en beplan ook ‘n toer in Desember deur die Wes-Kaap. Datums sal binnekort op sosiale media aangekondig word.

Vir nou, hou Hemel Op Die Aarde jou vas in die oomblik en herinner jou daaraan dat tuiskoms meer is as net ‘n plek – dis ‘n gevoel, ‘n keuse, en ‘n plek van vrede.

PUBLISITEIT & BEMARKING :

Vonk Musiek

Ashley Du Toit

Sel: 083 963 3055

E-pos: ashley@vonkmusiek.co.za

Kyra Grobler

Sel: 072 107 0069

E-pos: kyra@vonkmusiek.co.za

E-pos: pr@vonkmusiek.co.za

PLATEMAATSKAPPY :

Vonk Musiek

Francois Roux

Tel : 011 823 1771 / 061 312 2160   

E-pos : francois@vonkmusiek.co.za

Webwerf: www.vonkmusiek.co.za