Author: Ashley Du Toit

Na 18 jaar op Suid-Afrika se dansvloere en in die harte van sokkieliefhebbers, het Ray Dylan besluit om sy ikoniese treffer “Hokaai Stoppie Lorrie” ’n splinternuwe klank te gee — en dis rock n roll soos net Ray dit kan doen.

“As hierdie song ’n partytjie kon wees in lewende lywe, wow man,” lag Ray. “Ek sien net kampvuur, kitare, defnitief dans om die kampvuur en ’n ys koue biertjie.” Hierdie beeld som perfek op wat hy met die heruitreiking van die liedjie wil bereik: ’n herlewing van daardie nostalgiese partytjievibes met ’n moderne klank.

Die oorspronklike weergawe van “Hokaai Stoppie Lorrie” het vinnig een van Ray Dylan se “flagships” geword – ’n lied wat mense onmiddellik assosieer met sokkies, sonsondergange en daardie onvergeetlike girl van gisteraand. Nou, met sy live band, vars produksie en kragtige kitaarwerk, het hy die lorrie weer aangesluit vir ’n nuwe generasie.

“Dis kitare, dis rock n roll, dis my live band – ek dink die lorrie gaan vir baie jare nog nie stop nie,” sê Ray met ’n glinster in die oog.

Die nuwe weergawe behou steeds die geliefde lirieke wat aanhangers oor die jare uit hulle koppe uit ken:

“Gistraand se party is oor en uit / Die son begin oor die berge kruip / En die wiele draai – ja, die wiele draai…”

“Hokaai stoppie lorrie, dis hier waar ek vanaand wil bly / Hokaai stoppie lorrie, bring al jou pelle saam / Ons gaan dans dat die stof so staan…”

Maar Ray gee dit nou ’n nuwe klankbaadjie – een wat die dansvloere weer sal laat bewe. “Ons het nuwe sounds wat ons moet toets, en trek hom ’n nuwe baadjie aan. Ons gee hom ’n nuwe spin op die dansvloer,” sê hy.

Vir Ray is “Hokaai Stoppie Lorrie” meer as net ’n lied – dis ’n gevoel, ’n herinnering, en nou, met sy heruitreiking, ’n uitnodiging. “Maak nie saak wie jy is nie – as jy die song vir die eerste keer hoor, maak jouself gereed vir ’n groot party. Lekker dans, lekker vas-sokkie, lekker sweet op die voorkop… want ons gaan rock.”

So, sit daai bottel op ys, stof die dansskoene af en kry jou pelle bymekaar — Ray Dylan se “Hokaai Stoppie Lorrie” is terug, groter en beter as ooit. En die wiele? Hulle draai weer… of hoe?

PUBLISITEIT & BEMARKING :

Vonk Musiek

Ashley Du Toit

Sel: 083 963 3055

E-pos: ashley@vonkmusiek.co.za

PLATEMAATSKAPPY :

Vonk Musiek

Francois Roux

Tel : 011 823 1771 / 061 312 2160   

E-pos : francois@vonkmusiek.co.za

Webwerf: www.vonkmusiek.co.za

Juan Boucher, die geliefde multi-platinum sanger en liedjieskrywer wat reeds diep spore in die Afrikaanse musieklandskap getrap het, is terug met ’n nuwe kortspeel-album “Dis Presies wat Liefde doen”. En dié keer doen hy dit op sy eie manier — as die eerste vrystelling van sy splinternuwe platemaatskappy, Boland Musiek.

“Dis Presies wat Liefde doen” is alles behalwe oppervlakkig. Met ses splinternuwe snitte wys Juan weereens hoekom hy as een van die mees dominante kunstenaars in die Afrikaanse bedryf beskou word. Sy kenmerkende rasperstem en eerlike lirieke vat luisteraars op ’n emosionele reis — van passie en pyn tot verlange en verlossing.

“Dodelik”, die eerste snit, is ’n vurige liefdeslied wat die gevaar en aantrekkingskrag van ’n intense verhouding ondersoek. Dit is gevolg deur “Ek Ken Jou”, ’n rou, intieme ballade oor sielsverbinding en herkenning. Juan se samewerking met Tasché in “Noord” staan uit as ’n duet wat nie net harmonieus nie, maar ook diep simbolies is – ‘n soeke na rigting en liefde in ’n deurmekaar wêreld.

Met “Liefde” bring hy ’n eerlike weergawe van hoe liefde gelyktydig kan breek en bou, terwyl “Seun” ’n pragtige ode is aan vaderskap en die transformerende krag van ’n kind se teenwoordigheid. “Die Bus” sluit die album af met ’n poëtiese reis oor verlies, herinneringe en aanvaarding.

Hierdie album bevestig Juan se vermoë om nie net liedjies te skryf nie, maar om stories te vertel wat resoneer met mense van alle ouderdomme. Hy weet hoe om sy aanhangers se harte warm te hou — en met hierdie vrystelling oortref hy weer verwagtinge.

Maar dis nie al nie. Saam met die album bekendstelling, tree Juan ook amptelik as mede-stigter van sy eie platemaatskappy na vore: Boland Musiek. In samewerking met Kobie Koen is die maatskappy gebore uit ’n droom – om musiek te maak wat nie net gehoor word nie, maar gevoel word.

Gebore tussen die berge en wingerde van die Paarl, is Boland Musiek meer as net ’n handelsmerk. Dis ’n gevoel — van tuiskoms, van egtheid, van stories wat gesing word met die geure van die Boland in elke noot. “Dis musiek wat die siel roer en die geskiedenis laat leef,” sê Boucher.

Juan Boucher se is terug— met ’n nuwe album én as stigter van ’n platemaatskappy — is ’n bevestiging van sy vasberadenheid om musiek nie net te maak nie, maar betekenisvol te leef. “Dis Presies wat Liefde doen” is nie net die titel van sy album nie — dit is ’n weerspieëling van sy kreatiewe hartklop.

Boland Musiek staan op die drumpel van iets besonders. Soos Juan self sê: “Daar is niks so ongelooflik soos om musiek te ontdek wat tydloos is nie.”

En met hierdie vrystelling wys hy presies wat liefde doen: dit bou, dit bind, en dit bly.

PUBLISITEIT & BEMARKING :

Vonk Musiek

Ashley Du Toit

Sel: 083 963 3055

E-pos: ashley@vonkmusiek.co.za

PLATEMAATSKAPPY :

Vonk Musiek

Francois Roux

Tel : 011 823 1771 / 061 312 2160   

E-pos : francois@vonkmusiek.co.za

Webwerf: www.vonkmusiek.co.za

Die energieke en geliefde Afrikaanse sanger en storieverteller Armand Steenkamp is terug met ’n splinternuwe enkelsnit vol karakter, kuier-genot en hartlike humor. Sy nuutste vrystelling, “Woeste Manne van Worcester,” is, 16 Mei 2025, vrygestel op alle digitale platforms – saam met ’n eg Suid-Afrikaanse musiekvideo wat reeds die harte van aanhangers verower het.

Die inspirasie agter die lied spruit uit ’n visvangtrip wat Armand se vriend, Tiennie, saam met ’n groep vriende in Terracebaai onderneem het. Hoewel Armand self nie op daardie spesifieke wegbreek was nie, het die foto’s, stories en herinneringe daarvan diep bly lê – en uiteindelik het die liedjie homself agter die stuur van Armand se bakkie kom opdis.

“Ek dink toe – dít is een van daai tipe trips waarheen ’n mens net moes saamgaan,” sê Armand. “Daai gedagte het my nie weer losgelaat nie.”

Die lied vertel op humoristiese wyse van ’n klomp regte vriende – met hul regte byname soos Gommie, Tiennie en ander – wat saam die lekker van die lewe proe. Die bus met visstokke op die neus en wyn in die trailer is net een van die kleurvolle beelde wat hierdie storie laat leef.

“Ek skryf oor dit wat vir my genot bring – vriende, visvang, jag, kuier en natuurlik… lag,” verduidelik Armand. “My musiek is vol stories, en dié lied is ’n ode aan broederskap en die lekker dinge in die lewe.”

Die musiekvideo, waarin van die oorspronklike manne self verskyn, is met groot verwagting ontvang en weerspieël die gees van egtheid wat Armand se werk so uniek maak. Alhoewel die wêreld soms swaar voel, is sy doel duidelik:

“Die wêreld is donker genoeg – as ek iemand kan laat lag of bietjie vreugde bring, dan het ek my werk gedoen.”

“Woeste Manne van Worcester” is nie net ’n jolige kuierlied nie – dit dra ’n dieper boodskap van dankbaarheid, vreugde en verbondenheid. Met nog nuwe musiek wat reeds in beplanning is – liedjies oor vriendskap en die eenvoudige lekker van die lewe – wys Armand dat sy hart en pen altyd in die regte plek.

Daar is liedjies wat jou laat dans, liedjies wat jou laat droom, en dan is daar liedjies soos “Sonkring” – ’n lied wat jou stil maak, jou laat luister, en jou herinner aan die lig wat selfs in die donkerste tye deurbreek. Gian Groen se jongste enkelsnit is nie net ’n musiekstuk nie, maar ’n hartstukkie van ’n man wat saam met sy gesin deur een van die moeilikste seisoene van hul lewens gestap het – en steeds hoop gekies het.

Met lirieke wat beeldskoon verweef is met emosie en simboliek, gee Gian eer aan die mense wat ’n verskil gemaak het toe hy en sy vrou, wat met borskanker gediagnoseer is, nie self die pad kon stap nie.

“Ek verwys na mense om ons wat ons dra deur moeilike tye. Mense wat ’n positiewe verskil maak in ons lewens,” sê Gian.

“By tye was dit die Sonkring wat ons gesin gedra het wanneer ’n magtelose gevoel ons oorweldig het.”

Die lied “Sonkring” is dus meer as net ’n metafoor – dis ’n liefdesbrief aan die kring van ligdraers wat ons herinner dat ons nie alleen is nie. Dit vang die siel vas van wat dit beteken om te glo in lig, selfs wanneer die nag lank en koud voel:

“Volg net die Sonkring, jou voete vind ‘n nuwe weg na buite.

Oral is daar Oos of Wes besluite.

Die Sonkring sal gou hier uit kan kry…”

Hierdie lied, getoonset in ‘n styl wat dromerig en introspektief begin maar ontwikkel in ’n euforiese, dansbare klank, het volgens Gian met ’n eenvoudige rympie in sy kop begin. Soos baie van sy musiek, het die lirieke homself geskryf soos die metafore en melodieë begin vorm aanneem het. Hoewel “Sonkring” as enkelsnit vrygestel is, is dit slegs die begin van iets groters:

“Hierdie metaforiese verwysing sal vir die res van my lewe blywend wees. Dus sal my volgende album definitief hierdie titel hê,” verklap Gian, en noem ook ’n moontlike vollengte film (Vier Seisoene Kind) meer besonderhede hieroor sal later bekend gemaak word

Die lied se verwerking is deur Anton L’Amour se kitaarwerk geinspireer en het ’n gevoel wat herinner aan Theuns Jordaan se styl – ’n gepaste huldeblyk aan ’n era van betekenisvolle ballades.

Wat hoop Gian luisteraars uit die lied neem?

“Mens hoef nie moeilike tye alleen aan te pak nie. Laat diegene om jou toe om jou van hulp te wees.”

“Dis letterlik ’n kring van vriende wat figuurlik sonlig was in donker tye.”

Met “Sonkring” bring Gian Groen nie net ’n nuwe klank na die Afrikaanse bedryf nie – hy bring ook ’n boodskap van lig, liefde, en die krag van gemeenskap. En dalk, as jy stil genoeg luister, hoor jy ook jou eie Sonkring – daardie mense wat jou help staan wanneer jy nie meer self kan nie…. Ubuntu.

PUBLISITEIT & BEMARKING :
Vonk Musiek
Ashley Du Toit
Sel: 083 963 3055
E-pos: ashley@vonkmusiek.co.za

PLATEMAATSKAPPY :
Vonk Musiek
Francois Roux
Tel : 011 823 1771 / 061 312 2160
E-pos : francois@vonkmusiek.co.za
Webwerf: www.vonkmusiek.co.za

In ’n wêreld waar egte liefde soms skaars voel, bring Christiaan Baartman ’n warm en opregte herinnering aan die krag van liefde met sy jongste vrystelling, Somerblom. Dié nuwe enkelsnit is nie net ’n liefdeslied nie – dit is ’n huweliksgeskenk, ’n eerbetoon aan ’n sielsverhouding wat hom diep geraak het.

Christiaan, wat bekend is vir sy groot hart en diepe verbondenheid aan sy mense, het Somerblom geskryf vir twee van sy naaste vriende, Analda Breedten en Francois Charl du Toit. “Hulle liefde het my eenvoudig geïnspireer,” vertel hy. “Dis daardie tipe liefde wat jou weer aan die mooi in die wêreld laat glo.”

Die paartjie se verhouding dien as die anker vir die lied – ’n verhouding waarin daar ruimte is vir genesing, veiligheid, en die tipe vertroue wat storms kan weerstaan. Hierdie emosionele kern is duidelik in die lirieke van die lied:

“Jy is my son, my somerblom / Jy is die reuk van die veld na die reën / Kom wat wil, kom wind, kom weer / Ek min jou innig, altyd my blom, my somerblom.“

Wat die lied nóg meer spesiaal maak, is dat dit ook die handtekening van Leon Gropp dra. Christiaan het die lied aanvanklik geskryf, en Leon  het gevra of hy daaraan kan skaaf en dit fyn te slyp. Die samewerking tussen hierdie twee talentvolle kunstenaars het gelei tot ’n lied wat nie net liries sterk is nie, maar ook musikaal diep resoneer.

Met beeldryke poësie en opregte emosie, vang Somerblom die essensie van ware liefde vas – liefde wat lig bring wanneer alles donker voel, liefde wat asem gee wanneer hoop skaars is.

Die tweede vers en brug sluit die sirkel van die storie:

“Jy is my huis, jy is my see / Ek sal in ’n oogwink, lief, my lewe gee.“

Baartman se kenmerkende stem, in samewerking met Gropp se kreatiewe insig, gee aan die lied ‘n tydlose kwaliteit. Somerblom is ’n lied vir paartjies, vir dromers, en vir almal wat al ooit geglo het in die krag van liefde.

Hierdie is nie net ’n nuwe lied vir Christiaan Baartman nie – dis ’n monument vir ’n liefde wat inspireer. ’n Somerblom, geplant in die hart van Afrikaanse musiek.

PUBLISITEIT & BEMARKING :
Vonk Musiek
Ashley Du Toit
Sel: 083 963 3055
E-pos: ashley@vonkmusiek.co.za

PLATEMAATSKAPPY :
Vonk Musiek
Francois Roux
Tel : 011 823 1771 / 061 312 2160
E-pos : francois@vonkmusiek.co.za
Webwerf: www.vonkmusiek.co.za

In ’n tyd waarin egtheid en emosie al hoe meer skaars raak in kommersiële musiek, bring Wynand Strydom vir ons ’n lied wat nie net diep persoonlik is nie, maar ook ’n universele boodskap van verlange en herinnering dra. Sy nuutste vrystelling, “Saam Staan”, is nie net ’n lied nie – dit is ’n huldeblyk, ’n herinnering, en ’n glasie wat gelig word vir dié wat nie meer hier is nie.

Die lied is oorspronklik geskryf deur Morne Postma en Wouter van de Venter, in herinnering aan Morne se oorlede vriend, Rudi. Maar vir Wynand het dié woorde twee jaar gelede, op Kersdag, ’n nuwe betekenis gekry toe sy eie beste vriend, Johan van der Merwe, oorlede is.

“Ek het die liedjie altyd mooi gevind,” vertel Wynand. “Maar ná Johan se dood het dit my op ’n heel ander manier getref. Ek het toe vir Morne genader en gevra of ek dit mag verwerk en opneem – as ’n ode aan my vriend, en aan vriendskap self.”

“Saam Staan” spreek van die stil oomblikke wanneer jy om ’n braaivleisvuur sit, of selfs alleen is, en jou gedagtes wegdwaal na iemand wat jy liefgehad het en verloor het. Dit raak aan die rou van ’n vrou wat haar lewensmaat mis, en herinner aan die krag van vriendskap en die waarde van saamstaan – selfs ná die afskeid.

Met lirieke soos:

“Saam staan deur duk en dun / Ek lig my glas op waar ek aan jou dink”

raak die lied elkeen wat al ’n geliefde moes groet. Dit is ’n lied wat jou nooi om te onthou, maar ook om te vier – die lewe, die liefde, en die nalatenskap van iemand wat sy merk op jou hart gemaak het.

Die brug van die liedjie dra ’n besondere diepte:

“Ja die lewe is duur, maar jy’t die prys betaal / Ons liewe Vader het ’n yster kom haal.”

Hier bring Wynand eer aan die krag, moed en karakter van sy vriend – iemand wat tot op die einde bly veg het, en steeds ander geleer het om sterk te wees.

Musikaal is die lied ’n sielvolle ballade met opregte Afrikaanse klankkleur – Wynand se stem bring die emosie eerlik en rou oor. “Saam Staan” is meer as net ’n snit op ’n speellys – dit is ’n herinnering wat weer lewe kry met elke luister.

Vir enigiemand wat al ’n vriend, ’n broer, ’n pa, ’n sielsgenoot verloor het – “Saam Staan” is ’n liedjie wat met jou sal praat. Dit nooi jou om stil te staan, te onthou, en dan – om weer op te staan, saam te staan, en aan te gaan met die lewe.

PUBLISITEIT & BEMARKING :
Vonk Musiek
Ashley Du Toit
Sel: 083 963 3055
E-pos: ashley@vonkmusiek.co.za

PLATEMAATSKAPPY :
Vonk Musiek
Francois Roux
Tel : 011 823 1771 / 061 312 2160
E-pos : francois@vonkmusiek.co.za
Webwerf: www.vonkmusiek.co.za

Met sy kenmerkende stem en digterlike lirieke, bring Tino weer ‘n meesterstuk om na te luister met sy nuwe enkelsnit, “Rosie Rosie” — ‘n lied wat luisteraars neem op ‘n reis van verlange, verandering en ‘n nuwe begin

Die lied vertel die storie van Rosie, ‘n vrou wat die stad agterlaat om haar ware self te vind langs die see. Maar Rosie is meer as net ‘n karakter — sy is ook ‘n simbool van hoop, van innerlike groei, en van die moed om jou hart te volg.

“Ek wou ‘n storie vertel oor iemand wat smag na ‘n plek waar hulle werklik behoort,” sê Tino. “Dis ‘n universele gevoel – die verlange na ‘n lewe wat sin maak, wat jou siel genees. Rosie Rosie verteenwoordig daardie reis.”

Met lirieke soos “Jy laat die son skyn, jy laat die donkerte verdwyn” en “hier uit die dieper blou”, skep die lied ‘n amper filmiese ervaring – iets wat vir Tino baie belangrik is in sy skryfproses. “Ek wil hê mense moet die lied voel én sien, soos ‘n fliek in hul koppe.”

Die lied se klank is dromerig en nostalgies – ‘n mengsel van akoestiese warmte en oop lug-emosie. “Ons het gesoek na iets wat soos ‘n road-trip lied voel,” sê hy. “Tertius Human van Vonk Musiek het my gehelp om presies daardie gevoel vas te vang.” Die inspirasie het van plekke soos Stellenbosch en Oudtshoorn gekom – waar van die lirieke ontstaan het – maar ook uit Tino se eie lewenservarings: “Ek het self al groot veranderinge gemaak, soos om van Zim na Suid-Afrika te skuif. Ek weet hoe ‘n nuwe plek jou hele wese kan verander.”

En of Rosie nou ‘n regte persoon is of nie, sy leef nou in die harte van luisteraars. Die kitaarwerk en subtiele reverb roep beelde op van ‘n briesie aan die kuslyn, en skep ‘n gevoel van vryheid wat mense diep tref. “Ek wou hê dit moet mense laat voel soos om langs die see te staan en diep asem te haal.”

Volgens Tino is “Rosie Rosie” een van sy mees beeldryke en lirieksterk liedjies tot dusver – en hoewel dit vir nou as ‘n losstaande enkelsnit uitgereik is, is daar dalk ‘n album aan die horison. “Dalk,” sê hy met ‘n glimlag. “Daar’s altyd nuwe musiek op pad.”

Die reaksie van aanhangers tot dusver is presies wat Tino gehoop het: “‘Mense sê dit voel soos ‘n road-trip-lied, en dit is presies wat ek wou bereik.’”

Met “Rosie Rosie” bewys Tino weer hoekom hy een van die mees belowende stemme in Afrikaanse musiek is – ‘n kunstenaar wat nie net musiek maak nie, maar stories vertel wat diep in jou vassteek.

PUBLISITEIT & BEMARKING :
Vonk Musiek
Ashley Du Toit
Sel: 083 963 3055
E-pos: ashley@vonkmusiek.co.za

PLATEMAATSKAPPY :
Vonk Musiek
Francois Roux
Tel : 011 823 1771 / 061 312 2160
E-pos : francois@vonkmusiek.co.za
Webwerf: www.vonkmusiek.co.za