AMPIE EN STEVE HOFMEYR BETOWER MET SIELSGETOË DUET : ‘PRETORIA SE MAAN’

In ŉ tyd waar Afrikaanse musiek sy honderdjarige bestaansjaar vier, vier nóg ŉ kunswerk die lig: ŉ emosie-gevulde samewerking tussen twee van die genre se sterkste stemme – Ampie en Steve Hofmeyr – in die nuwe akoestiese treffer “Pretoria se Maan”. Hierdie lied, gekenmerk deur rou eerlikheid en nostalgie, bring twee kunstenaars van verskillende generasies saam in ŉ oomblik van suiwer musiek genot.

Vir Ampie, wat vanjaar sy 25ste jaar in die musiekbedryf vier, was hierdie duet ŉ onverwagte seën. “Die lewe is baie onvoorspelbaar,” vertel hy, “en soms bederf die goeie Vader jou sommer met ‘n klein wonderwerkie.” Dit was nooit ŉ voorafbeplande samewerking nie. Ampie het eenvoudig een van sy nuwe liedjies aan Steve Hofmeyr gespeel – en die legende het onmiddellik ingestem om saam te sing. “Dis ongelooflik dat ek saam hom ŉ song kon doen wat hy gehoor het en toe sê dis mooi. Dit wys jou – die lewe is kort, en jy moet dit voluit leef.”

Ampie het nie geskroom om sy bewondering vir Hofmeyr uit te spreek nie. “Steve is vir my ‘n legende. Of jy nou van hom hou of nie, hy staan vir iets – vir my en vir jou – en hy sing steeds waar ander sou ophou. Hoe respekteer jy nie dít nie?”

Daar is ‘n besonderse sirkel wat in hierdie duet voltooi word: vir jare het Ampie Steve se ikoniese “Agter Elke Man” tydens sy eie vertonings gesing. Nou deel hulle ŉ verhoog én ŉ liedjie – ŉ wederkerige erkenning van mekaar se impak in die musiekwêreld. “Ek sing daardie lied al vir dekades,” sê Ampie, “want dit voel vir my tydloos. Hierdie duet is soos ‘n droom wat ek nooit eers gehad het nie – dis net so onverwags.”

Steve Hofmeyr, wat al dekades lank ŉ stempel afdruk op Afrikaanse musiek, het met tipiese nederigheid reageer: “Dit is ŉ mooi lied. En dit was ŉ voorreg om saam met Ampie te kon sing. Dankie dat ek kon.” Met ŉ loopbaan wat die meeste Suid-Afrikaanse kunstenaars vêr oortref in lengte én invloed, dra Steve se betrokkenheid aan die projek ŉ spesiale gewig – nie net as sanger nie, maar as ikoon.

“Pretoria se Maan” is meer as ŉ lied; dis ŉ gedig oor verlange, gebrokenheid en identiteit. Die lirieke, gekombineer met ŉ intieme akoestiese klank, bring temas van jeugherinneringe, sonde, nostalgie en hoop tot lewe.

Daar is ŉ rou siel in frases soos:

“Ek is ŉ gemors, my siel bly dors,
Ek het ophou drink, maar my kop raas nog.”

En ‘n treffende refrein wat telkens terugkeer na die maan van Pretoria as stille getuie van ŉ stukkende maar steeds dromende hart:

“As ek opkyk na die torings
En Pretoria se maan…”

Die lied se brug roep nostalgiese musiekbeelde op:

“Op ‘Sweet Child of Mine’ gevry,
En my luck getry…”

Dié sterk beeldende taal en eerlikheid tref ŉ snaar – of jy nou in Pretoria grootgeword het of net jou eie maan soek.

In ŉ tyd waar opregtheid skaars word, bring “Pretoria se Maan” vir luisteraars iets eg. Hierdie duet is nie net ŉ musikale samewerking nie – dis ŉ huldeblyk aan die geskiedenis, aan identiteit, en aan die wonder van onverwagte oomblikke. Dit is ook ŉ herinnering dat die beste kuns dikwels gebeur wanneer dit glad nie beplan is nie.

Met Ampie se geloof, Steve se teenwoordigheid, en Pretoria se maan wat oor alles skyn – is dit duidelik: hierdie lied gaan ŉ klassieke Afrikaanse sielsverhaal bly.

https://www.youtube.com/watch?v=kdkvLEvDC4U Facebook Tiktok Instagram